ახალი ამბები

დედა პარასკევა: მოუფრთხილდნენ ქართველ ერს

,,მთელი მსოფლიოსთვის გადარჩენის დაფარული საიდუმლოება, ღვთისაგან, მამა გაბრიელის მეოხებით, ქართველი ერისგან მოხდება’’, – ამის შესახებ “პრესა.ჯი”-ს დედა პარასკევამ განუცხადა. არქიმანდრიტი ბერის კანდელის ზეთის მადლით, უამრავი ადამიანი დღესაც იკურნება. როდის მოხდება მამა გაბრიელის საფლავის გახსნა და ამ პროცესის დროს განიკურნებიან თუ არა ადამიანები? “პრესა.ჯი” დედა პარასკევას ესაუბრა.

გაზიარება
[თეონა მანაგაძე. 21:20 20-01-2011]

რამდენად ხშირია ისევ მამა გაბრიელის მეოხებით ადამიანების განკურნება?
– ყოველდღე, უამრავი შემთხვევა ფიქსირდება მამა გაბრიელის მეოხებით ადამიანების განკურნებისა. ბევრს სურვილებიც უსრულდებათ, რომელიც ადამიანს არ შეეძლო შეესრულებინა. მათ ღმერთის მადლით და მამა გაბრიელის მეოხებით უსრულდებათ ეს სურვილები და რწმუნდებიან, რომ ღმერთს ყოველივე შეუძლია.
რაც შეეხება მამა გაბრიელის საფლავის გახსნას, რატომ უნდა გაიხნას და როდის?
– მამა გაბრიელის საფლავის გახსნა ასე უცებ ალბათ არ მოხდება. ზოგჯერ ღმერთი აჩერებს ხოლმე რაღაც განსაკუთრებულ მადლს, რათა ადამიანები სარწმუნოებაში, რომ განელდებიან უცბად მოაბრუნოს რწმენისკენ და დაარწმუნოს ღვთის დიდ წყალობაში. მამა გაბრიელის საფლავიც, მაშინ გაიხსნება, როცა ეს ქართველებს დასჭირდებათ. საქართველოს აქვს განსაკუთრებული საღმრთო მადლი. ღვთისმშობლის განსაკუთრებული მფარველობის ქვეშ არის. იოანე ზოსიმეს საიდუმლოება მამა გაბრიელის საფლავის გახსნით გამოვლინდება.
ეს დიდი სასწაულმოქმედება იქნება ქართველი ერისათვის. ადამიანები დაინახავენ, რომ გაიხსნება ის საიდუმლოება, რომელიც დაფარული არის ქართველ ერში. არ შეიძლება საქართველოს შევიწროება, ქართველი ერის ასეთი უგულვებელყოფა, რომ აჭირვონ სხვა ქვეყნებმა. საქართველოს უამრავი მაჭირვებელი ჰყავს, მიუხედავად ამისა ქვეყანა ფეხზე დგას. უამრავი ქვეყანა, რომლებიც უფრო დიდნი არიან, ვიდრე საქართველო საშინელი გასაჭირის ქვეშ არიან. ესეთი განსაცდელებისგან კი საქართველოს ღმერთი იფარავს. მოუფრთხილდნენ ქართველ ერს. მთელი მსოფლიო თუ არ მოუფრთხილდა, საქართველოს ფარული საიდუმლოება, რომელიც მთელ მსოფლიოს უნდა განეცხადოს, ამ ერით არ მოხდება. ამიტომაც საქართველოს განსაკუთრებული მისია აკისრია მთელი მსოფლიოს გადარჩენისათვის.
ამას მამა გაბრიელი ამბობდა ხოლმე. აი ეს დაფარული მადლი ზუსტად მაშინ განცხადდება, როცა ეს საჭირო იქნება საქართველოსთვის და მთელი მსოფლიოსთვის, რომ ყველა გადარჩეს ვისაც გადარჩენა უნდა. განსაკუთრებული საიდუმლოება გითხარი. ისეთი, რომელიც მთელ მსოფლიოს უნდა გააცნო. გავხსენი იოანე ზოსიმეს საიდუმლოება, არავითარი წელი, ძალიან მალე განცხადდება საიდუმლოება.
ამბობენ, რომ მამა გაბრიელის საფლავის გახსნა რომ მოხდება მონასტერის ტერიტორიაზე მყოფი ადამიანები ყოველგვარი ავადმყოფობისგან განიკურნებიან…
– არა მარტო მონასტრის გარშემომყოფნი, არამედ საფლავის გახსნის დროს უამრავი კილომეტრების მანძილზე უამრავი სასწაული მოხდება. ასე ხდება წმინდა მამების საფლავების გახსნის დროს. შეიძლება უნდოდეს ადამიანს აქ მოსვლა, თუმცა ვერ მოვიდეს, მაგრამ რწმენით იქაც კი განიკურნება, სადაც იქნება. კიდევ ვიმეორებ, მამა გაბრიელს არ დაუბარებია როდის გაიხსნებოდა საფლავი, მან თქვა, რომ გაიხსნება მისი საფლავი. ეს მოხდება მაშინ, როდესაც განსაკუთრებულად აუცილებელი იქნება. ღვთის განგებულების ქვეშ არის ეს.
მსოფლიოში არის ქვეყნები, სადაც წყალდიდობებისა და მიწისძვრების შედეგად ადამიანები იღუპებიან. საქართველოში ბევრი გაჭირვების მიუხედავად იმ ფონზე სიმშვიდეა…
– საქართველოსთვის მამა გაბრიელს ვევედრებით, მამა გაბრიელი კი ევედრება უფალს, რომ დაიცვას ჩვენი ქვეყანა სადიდებლად ღვთისა. მთელმა მსოფლიომ დაინახოს განსაკუთრებული მადლი აქვს საქართველოს, აქედან გამომდინარე მსოფლიოში რაც არ უნდა მიწისძვრები, კატაკლიზმები მოხდეს, აქ არაფერი მოხდება. საქართველო მართლაც ღვთის წილხვედრია. „ვეფხვისტყაოსანში“ წერია „საქართველო არის ვით მარგალიტი ობოლი ხელი ხელს საგოგმანები“. საქართველოს მიერ უნდა განცხადდეს გადარჩენის საიდუმლოება, დაწერია დღემდე მეორედ მოსვლისა და ეს საიდუმლოება, სადაც არის გაიხსნება. ეს არის იოანე ზოსიმეს დაწერილი, რომ ამათი ენითა იდიდოს ღმერთი, ზუსტად ეს არის საიდუმლოება, რომელიც განცხადდება. ეს მგონი ძალიან მალე მოხდება, მაგრამ საჭიროა ქართველი ერი იყოს რწმენაში.
რაც შეეხება მამა გაბრიელის წმინდანად შერაცხვას . . .
– პროცესი სჭირდება ამას, რომ მართმადიდებელი ქართველი ერი სარწმუნოებაში იყოს და მთელმა მსოფლიომ შეიცნოს რა შეუძლია ღმერთს ადამიანების მეოხებით. მამა გაბრიელის მეოხებით, გადარჩეს ყველა ვისაც გადარჩენა სურს. ყველაფერი მოგვარდება და დალაგდება. დამიჯერეთ ეს ძალიან მალე მოხდება.
საქართველოში ადამიანები ძალიან გამტკიცებულები არიან რწმენაში, თუმცა მეტ რწმენას მოითხოვს ღმერთი, რადგან რწმენის გარეშე ადამიანი ვერ გადარჩება. მრევლი გამრავლდა, თუმცა მეტი რწმენა სჭირდება.

presa.ge

ვის ლიკვიდაციას გეგმავენ ვანო მერაბიშვილი და მიხეილ სააკაშვილი?!

რამოდენიმე დღის წინ ჩვენ რედაქციას მეგრული, სვანური და ლაზური ენების აღიარებისთვის აქტიურად მებრძოლი იურა ღვინჯილია ესტუმრა. რედაქცია, ამ პიროვნების არანორმალურ მოთხოვნებზე, მაგალითად როგორიცაა საქართველოს სკოლებში სწავლების მეგრულ ენაზე დაწყება და ცენტრალური ტელევიზიების მაუწყებლობის ენის მეგრულით შეცვლა, ყურადღებას შეგნებულად არ ამახვილებდა. მას შემდეგ რაც ღვინჯილიამ გვითხრა, რომ, სააკაშვილი–მერაბიშვილის ხელისუფლება მის ლიკვიდაციას გეგმავს გადავწყვიტეთ შველის სათხოვნად მოსული ქართველი არ გაგვეწბილებინა. ღვინჯილიამ აგვიხნა, რომ სახლში კონტრდაზვერვის თანამშრომლები მიუვარდნენ და დაემუქრნენ: თუ მეგრული ენის პოპულარიზაცია განვითარებისთვის მუშაობას არ შეწყვეტ მოგკლავთ ან უკეთეს შემთხვევაში დაგატუსაღებთო–ო. განათლების ცენტრ „კოლხიდას“ ხელმძღვანელი, მასზე თავდასხმის მცდელობაში გუბერნატორ ზაზა გოროზიას ადმინისტრაციასაც ადანაშაულებს.

გაზიარება
[16:26 12-01-2011]

აქვე, ჟურნალ „ღია ბოქლომის“ სახელით აღვნიშნავ, რომ მეგრული ენის საწინააღმდეგო ნამდვილად არაფერი გვაქვს, მაგრამ სეპარატისტულ აზრებსა და აზროვნებას მხარს არასოდეს დავუჭერთ. მეგრული არის ერთ–ერთი უძველესი ქართველური ენა, რომელიც დიდი ყურადღების ღირსია, ხოლო საკითხის მიმართ ღვინჯილიასეული მიდგომა არასწორად მიგვაჩნია.
სანამ ინტერვიუს შემოგთავაზებდეთ გავეცნოთ ნაწყვეტს, სრულიად საქართველოს კათოლიკოს პატრიარქის უწმინდესის და უნეტარესის ილია მეორეს 2010 წლის საშობაო ეპისტოლედან:
“როგორც ცნობილია, XIX ს-ის ბოლოს მეფის რუსეთის იმპერიაში შემუშავდა “მეცნიერული” კონცეფცია (დაყავი და იბატონეს პრინციპის გათვალისწინებით) საქართველოში მეგრულ-ლაზურ-ქართულ-სვანური ენებისა და კულტურების დამოუკიდებლად არსებობის შესახებ.

ეს პროცესი, მეტ-ნაკლებად ფარულად, კვლავაც მიმდინარეობს და, რა თქმა უნდა, მხოლოდ და მხოლოდ უცხო ქვეყნების ინტერესებს ემსახურება”.
იურა ღვინჯილია: – ჩემს მიმართ აგორდა ორგანიზებული, საინფორმაციო ტერორი პრესაში. მაგალითად ინტერნეტში. ჩემ დისკრედიტაციაში მონაწილეობას იღებდნენ: სამეგრელოს გუბერნატორის ზაზა გოროზას ადმინისტრაციის თანამშრომლები; ზუგდიდის თეატრის მმართველი მაია კალანდია; საგადასახადო ინსპექციის თანამშრომელი გივი ახალაია და სხვა ანტიმეგრული კომპანიის „აკტივისტები”. იყო შეურაწყოფა და მუქარა, რომ მომკლავდნენ. კეთდებოდა რასისტური შინაარსის განცხადებები. ბრალს მდებდნენ რუსეთის აგენტობაში. ახლახანს, სახლში მომივარდნენ სამეგრელოს კონტრდაზვერვის რეგიონალური სამმართველოს თანამშომლები და გამაფრთხილეს თუ არ გაჩერდები ნარკოტიკებს ან იაღაღს დაგიდებთ სახლში ან საერთოთ გაგაქრობთო.
რას ითხოვთ? ნუთუ ასეთ საფრთხეს წარმოადგენთ ხელისუფლებისთვის?
–საქართველოში ანტიმეგრული იდეოლოგია სახელმწიფო პოლიტიკის რანგშია აყვანული და არსებობს საფუძვლიანი ეჭვი რომ სპეცსამსახურები გეგმავენ ჩემ ლიკვიდაციას. თუ რამე დამემართა სრულ პასუხისმგებლობას ვაკისრებ სააკაშვილი–მერაბიშვილის ხელისუფლებას.
მე მხოლოდ სახელმწიფოებრივი ინტერესი მამოძრავებს და ვიბრძვი უძველესი ქართველური ენების მეგრულის, სვანურის და ლაზურის შენარჩუნება განვითარებისთვის.
არამარტო ხელისუფლება, არამედ საზოგადოებაც გაემიჯნა მეგრულ ენას, ჩვენი ორგანიზაციის მთავარი მიზანია, მეგრული და სვანური ენებისთვის შეიქმნას საკანონმდებლო ბაზა, ანუ ენებს უნდა მიენიჭოს რეგიონალური ენის სტატუსი და მასზე გავრცელდეს ევროპის ქარტიით გათვალისწინებული ნორმები, მაგალითად, როგორიცაა ტელე-რადიომაუწყებლობის არსებობა მეგრულ ენაზე. ამ ეტაპზე ენის შენარჩუნება გადარჩენისთვის ეს იქნებოდა არაჩვეულებრივი გზა.
გაერო-ს დასკვნების მიხედვით არამარტო მეგრული, არამედ ქართული ერიც არის შეტანილი გადაშენების პირას მდგარ ერებს შორის. ამიტომ უნდა ვიბრძოლოთ, რომ გადავრჩეთ.
ხომ არ ფიქრობთ, რომ ამ საკითხის წინ წამოწევა გამოიწვევს იმ სცენარის განვითარებას, რაც აფხაზეთში მოხდა. აფხაზებმაც ხომ ასე დაიწყეს ბრძოლა ენის აღიარებისთვის და შემდეგ, დამოუკიდებლად არსებობის სურვილიც გაუჩნდათ?
-ყველაფერი შესაძლებელია. როდესაც არსებობს პრობლემა და მას ყურადღებას არავინ აქცევს, მაშინ შესაძლოა, პრობლემა უმართავი გახდეს, ამიტომ საჭიროა საზოგადოების მეტი აქტიურობა.
რატომ გგონიათ რომ ხალხი მხარს დაგიჭერთ?
–ევროსაბჭოში გაწევრიანებისას 1999 წელს საქართველომ აიღო ვალდებულება ერთი წლის განმავლობაში ხელი მოეწერა რეგიონალურ ან ეროვნულ უმცირესობათა ენების შესახებ ევროპულ ქარტიისათვის და მოეხდინა მისი რატიფიცირება. თუმცა 10 წლის გასვლის შემდეგაც, ქარტია არ არის რატიფიცირებული და ეს საკითხი საზოგადოებაში არც განხილულა.
პოლიტიკური ვალდებულებების დარღვევა ისევე მიუღებელია, როგორც საერთაშორისო კანონის ნებისმიერი დარღვევა.
ქარტიის მიზანია ენის შენარჩუნება-განვითარება და არა ამ ენაზე მოსაუბრე მოქალაქეების პოლიტიკური უფლებების დაცვა.
როგორც ლინგვისტები ვარაუდობენ საუკუნის ბოლომდე მსოფლიო ენათა ნახევარი გაქრება.
ენები უფრო სწრაფად კვდებიან ვიდრე მცენარეები და ცხოველები. წითელ წიგნში შეიძლება შევიტანოთ 40%-ზე მეტი მსოფლიო ენა, რომელთა გაქრობა გარდაუვალია ეს მაშინ, როდესაც მცენარეთა 8%-ს და ცხოველთა 18%-ს ემუქრება გაქრობის საფრთხე. სტატისტიკა გვაჩვენებს, რომ ყოველთვე დაახლოებით ორი ენა კვდება. ენებთან ერთად კვდება განუმეურებელი კულტურა, წყდება სულიერი კავშირი წარსულთან. ენებთან ერთად კვდება ხალხი. დათვლილია, რომ ბოლო 500 წლის განმავლობაში დაკარგულია დაახლოებით ნახევარი ენები, რომელთაც ფლობდა კაცობრიობა და დარჩენილი 6000 ენიდან ნახევარსაც დაკარგავს რამოდენიმე ათწლეულში. მათ შორის იქნებიან სვანური, ლაზურ-მეგრული ენები.
ხალხი მეხსიერების, ენის დაკარგვით კარგავს ეროვნულ იდენტობას სახელმწიფო კი ტერიტორიებს.
რა კეთდება საქართველოში სვანურ ლაზურ-მეგრული ენის გადასარჩენად?!– არაფერი! დღევანდელ პოლიტიკურ ვითარებაში მეგრული ენისათვის სტატუსის მინიჭება იქნებოდა კარგი მაგალითი აფხაზებისათვის, რომ ქართულ სახელმწიფოში შესაძლებელია თვითმყოფადობის შენარჩუნება-განვითარება. თუმცა ამ ენებისადმი დისკრიმინაციული პოლიტიკის მაგალითზე მათვის გასაგები ხდება რომ მათ ენას როგორც მეგრულს საქართველოში სრული განადგურება ელოდება. ამით რუსებმა ქართველების ხელით შესძლეს ანტიქართული განწყობის დამკვიდრება. რუსებმა იგივე განწყობა დაამკვიდრეს სამეგრელოში და თავიანთი აგენტურული ქსელის მეშვეობით ცდილობენ საქართველოში საზოგადოებას თავს მოახვიონ იდეოლოგია თითქოსდა მეგრული არის დიალექტი და არა ენა. გარკვეული ჯგუფები გმობენ ბიბლიის თარგმას მეგრულ ენაზე, მეგრული ენისათვის სტატუსის მინიჭებას, ევროპული ქარტიის რეგიონალური ენების შესახებ რატიფიცირებას, საქართველოს ევროკავშირში და ნატოში გაწევრიანებას და ა.შ.
შექმნილია ახალი მეგრულ-ქართული ეთნოკონფლიკტის წინაპირობა, როდესაც არსებობენ „მჩაგვრელი“ ქართველები, რომლებიც არ აძლევენ „დაჩაგრულ“ მეგრელებს თავიანთი ენის შენარჩუნება-განვითარების შესაძლებობას.
მსოფლიოში ეთნოკონფლიქტების გამომწვევი ძირითადი მიზეზი არის ხალხის ლინგვისტური უფლებების, ისტორიულ-კულტურული მეხსიერების შეურაწყოფა.
ჩვენ გამოვეცით მეგრულ ენოვანი გაზეთი „შურობუმუ“ (სამშობლო) გაზეთის პირველი ნომერი ძირითადად დაეთმო მოხსენებას განათლების ცენტრ “კოლხიდა”-ს მიერ გაწეული მუშაობის შესახებ; ვწერდით, რამდენად გათვალისწინებულია სამეგრელოს რეგიონში, მეგრულად მოსაუბრე მოსახლეობის ინტერესები. გასაოცარი ის აღმოჩნდა, რომ სამეგრელოში მეგრული ენის შენარჩუნება-განვითარება სრულიად იგნორირებულია სახელმწიფოს მხრიდან.
მიუხედავად ჩვენი არაერთგზის მიმართვისა, ადგილობრივი და ცენტრალური ხელისუფლებისადმი ჩვენი მიმართვები პასუხგაუცემელი დარჩა.
მეგრეელი ხალხის კიდევ ერთ შეურაცყოფათ შეიძლება ჩაითვალოს, რომ ზუგდიდს ჩამოერთვა ქალაქის სტატუსი…

ჩვენი დროის ყვარყვარე თუთაბერი

ზუგდიდის შალვა დადიანის სახელობის სახელმწიფო დრამატულ თეატრში 23 დეკემბერს პრემიერა გაიმართა. მსახიობთა დასს და რეჟისორ სოსო ნემსაძეს, რომელიც კინოსა და თეატრის უნივერსიტეტის პროფესორია, პოლიკარპე კაკაბაძის „ყვარყვარე თუთაბერის“ სცენაზე გადმოსატანად 2 კვირა დასჭირდა. როგორც ნემსაძემ აღნიშნა, რეპეტიციები საგრძნობლად დააჩქარა ზუგდიდელი მსახიობების პროფესიონალიზმმა.

გაზიარება
[ილია ჩაჩიბაია. 23:53 23-12-2010]

წარმოდგენას, რაიონის პოლიტიკური და კულტურული ელიტის წარმომადგენლებიც ესწრებოდნენ. მაყურებელთა უმეტესმა ნაწილმა „ღია ბოქლომს“ უთხრა, რომ სპექტაკლი ერთ–ერთი საუკეთესო იყო, რომელიც თეატრში ახალი მმართველის მაია კალანდიას მოსვლის შემდეგ დაიდგა.
მუნიციპალიტეტის საკრებულოს თავმჯდომარემ ლევან კონჯარიამ კი გაგვიმხილა, რომ კულტურულ დაწესებულებას მალე მთავარი პრობლემა მოეხსნება და საუკუნე–ნახევრის თეატრს საკუთარი რეჟისორი ეყოლება.
ვისაც „ყვარყვარე თუთაბერი“ წაუკითხავს ახსოვს, რომ პიესის დასაწყისში ყვარყვარე ერთი უწყინარი მეოცნებეა, იგი ცეცხლის პირასაა მიმჯდარი და ნაცარში მომავლის გეგმებს “ქარგავს”, ხან მთაში გვირაბი გაჰყავს, ხან საცოლისათვის სასახლეებს, ბაღებსა და მარმარილოს კიბეებს აშენებს. მაგრამ თანდათან ვხვდებით, რომ მისი ზნეობა მისსავე ბედისწერადაა გადაქცეული. ბავშვობიდანვე მატყუარასა და უქნარას ხალხმა ნაცარქექია შეარქვა. მოგვიანებით მამამისმა წყვიწყვიმ მუქთახორა შვილს ცოლი არ მოაყვანინა და კეტით გააგდო საშოვარზე. ყვარყვარემ ერთხელ იჯარით ხიდის აშენებაც სცადა, მაგრამ უნებისყოფობისა და უცოდინარობის გამო საქმე ბოლომდე ვერ მიიყვანა. მას შემდეგ უსაქმურად დაეხეტებოდა დაბა-სოფლებში, სანამ ერთი მეწისქვილე სამადლოდ შეიფარებდა და ლუკმას გაუყოფდა, მაგრამ ნაცარქექიამ ჭკუა მაინც ვერ ისწავლა, ვერც ტყუილის თქმას გადაეჩვია და ვერც სიზარმაცე დათრგუნა, ზის ბუხრის პირას და კლდეში გვირაბის გაყვანაზე ოცნებობს, თუმცა პატარა ხიდის გაკეთება ჭირივით ეზარება. მინავლულ ცეცხლთან ჯირკი ვერ მიუგორებია და წისქვილის დანგრევით იმუქრება. ერთთავად ხალხისათვის თავდადებას იქადნის, მასსავით გუდამშიერ თანასოფლელებს, კაკუტასა და ქუჩარას კი უკანასკნელ ნაქურდალს ართმევს, ანუ, როგორც გოეთეს მეფისტოფელი იტყოდა, “სიკეთე სურს და ბოროტება გამოსდის”; ეს კიდევ რაა, უსახლკარო და უპოვარი დაუპატიჟებელი სტუმარი მასპინძლის კარში გაგდებას ლამობს. უნდა ითქვას, რომ ყვარყვარე არც ღონითა და სიმამაცით გამოირჩევა, ეს იმ სცენიდან ჩანს, სადაც ბოლშევიკ სევასტის მოკვლით ემუქრება, მაგრამ როგორც კი მისგან წინააღმდეგობას შეხვდება, შეშინებული ფქვილიანი ტომრების უკან დაიმალება.
საინტერესო ისაა, რომ თვითგადარჩენის ძლიერი ინსტიქტი ადამიანისაგან კომპენსაციის მიზნით, რომელიმე ერთი თვისების განსაკუთრებულ განვითარებასა და გააქტიურებას მოითხოვს, ამიტომ ყვარყვარეს თავის გატანის ერთადერთ და უძლეველ საშუალებად ენაჭრელობა და ტყუილის თქმა ამოურჩევია. ცრუპენტელობა ის ნიჭია, რომლითაც იგი სხვებს აღემატება და რომელსაც საგანძურივით უყურებს: “მე ყვარყვარე თუთაბერს ენით შენ შემომიარ?”. მისთვის ენა საკმარისი დასაყრდენია, რომ ყოველი საქმე ეშმაკურად მოაგვაროს, ბრიყვს თვალები აუხვიოს, სუსტი დააშინოს, ძლიერთან კი თავი მოისაწყლოს.
ნაცარქექიას ორპირობასა და ფარისევლობას განსაკუთრებით ის ფაქტი უადვილებს, რომ ზნეობა მისთვის ზედმეტი ტვირთია. საერთოდ, ასეთი ადამიანების გამარჯვებისა და წარმატების ნამდვილი საიდუმლო უპრინციპობასა და უზნეობაშია, ამიტომ ცხოვრებისეული ფილოსოფიაც შესაბამისი აქვთ:
“ეს ვერ გამიგია ზოგიერთი კაცი სირცხვილით მიწაში რომ ჩაძვრება, სირცხვილს რომ სჭამ კაცი, თუ ვარგიხარ, მაშინ თავი უფრო მაღლა უნდა ასწიო”.
და კიდევ ერთი ციტატა:
“კაცს კბილი უნდა გაუსინჯო, თუ ირყევა, მოთხარე; თუ მაგრადაა, გაქცევა მოასწარი, რომ არ გაგქელოს”.
ამგვარი ეპიზოდებიდან თანდათან იკვეთება ყვარყვარეს სულიერი სიღარიბის პორტრეტი და მისი ხასიათის ძირითადი თვისებები; იგი უნიადაგო მეოცნებეობის, სიზარმაცის, ბაქიაობის, უმადურობის, ლაჩრობისა და გაიძვერობის განსახიერებაა.
მაგრამ, მიუხედავად ამისა, ქვეყნის ისტორიაში დგება დრო, როდესაც ასეთი „გმირები“ მხსნელისა და წინამძღოლის მანტიებს ირგებენ.
ჟურნალ „ღია ბოქლომის“ მიერ დასმულ შეკითხვას, ასახავს თუ არა პიესის შინაარსი თანამედროვე საქართველოს დღევანდელობას, სპექტაკლის რეჟისორმა სოსო ნემსაძემ მრავალმნიშვნელოვნად გვიპასუხა და თქვა რომ „ყვარყვარე თუთაბერის“ არსი ყველა დროის საზოგადოებაში აქტუალურად დარჩება.
ყვარყვარე საბოლოოდ ერთი გაუბედურებული დედაკაცის მსხვერპლი ხდება, რომელსაც ახალი გუბერნატორის რეჟიმმა ქმარი დაუტუსაღა.

ქალის როლის შესანიშნავად შესრულებისთვის მაყურებლისგან ოვაცია დაიმსახურა ახალგაზრდა მსახიობმა ზალინა გერგაულოვამ. სწორედ ამ როლს, 24 დეკემბერს იგივე წარმოდგენაზე, აგრეთვე ახალგაზრდა მსახიობი თიკო შელეგია შეასრულებს…
ზუგდიდის თატრი კიდევ ერთი პრემიერისთვის ემზადება. 27 დეკემბერს, მსახიობები, მაყურებელს საახალწო ჩვენებაზე იწვევენ. მიუზიკლში „ქართველი წითელქუდა ამერიკაში“ ახალი სახეები მაყურებლის გულის მოგებას შეეცდებიან. წარმოდგენას დამწყები რეჟისორი გიორგი ფოჩხუა დგამს. მონაწილეობენ: ანანო სურმავა, თიკო შელეგია, ლანა ფიფია, ზალინა გერგაულოვა, მარინა დარასელია, ნანა ბუკია, გოგი გუგუჩია, ირაკლი სამუშია, ზური ლაშხია, მერაბ კაკალია და ლაშა ხიზანიშვილი.

ამხანაგმა გოგონებმა მეთერთმეტე კლასელი თეონა შეყვარებულის გამო სასიკვდილოდ სცემეს

რადგანაც ფაქტი სასკოლო არდადეგების პერიოდში მოხდა, აღნიშნულ სკოლებში ამ თემასთან დაკავშირებით სრულყოფილ ინფორმაციას არ ფლობენ, თუმცა მომხდარს არცერთი სკოლის დირექტორი არ უარყოფს.

გაზიარება
[20:25 17-01-2011]

ოზურგეთის #3 საჯარო სკოლის დირექტორის ნანა გაგუას თქმით, დაზარალებული მათი სკოლის მეთორმეტე კლასელი თეონა მ. . . – ია, რომელთან დაკავშირებაც სკოლის ხელმძღვანელობამ ამ დრომდე ვერ შეძლო. მან არც ამ გაუგებრობის მიზეზი იცის და არც ის, თუ სად მოხდა კონკრეტულად ჩხუბი.
ნანა გაგუა: ,,ჭორის დონეზე ვიცით ყველაფერი, ვერ ვხვდები, რა უნდა ყოფილიყო ჩხუბის მიზეზი. არც ის ვიცი, ტერიტორიულად სად მოხდა ეს ფაქტი. როგორც ამბობენ, დაზარალებული ჩვენი სკოლის მოსწავლე, მეთორმეტე კლასელი თეონა მ. . . –ია, რომელიც სოფელ …… ცხოვრობს. რადგანაც ახლა სკოლებში არდადეგებია, ჩვენ მასთან დაკონტაქტება, მიუხედავად დიდი მცდელობისა, ვერ მოვახერხეთ. სხვა არაფრის თქმა არ შემიძლია ამ თემასთან დაკავშირებით.”
ოდნავ განსხვავებულად განმარტავს მომხდარს #2 საჯარო სკოლის დირექტორი ირინა ინარიძე. მისი თქმით, უმნიშვნელო შელაპარაკება მოსწავლეებს შორის მე-2 საჯარო სკოლის მიმდებარე ტერიტორიაზე მოხდა.
,, არა მგონია ეს ფაქტი ასე მნიშვნელოვანი იყოს. ახალი წლის მომდევნო დღეებში, როგორც ვიცი,სკოლის წინ მოხდა ჩხუბი. იყო უმნიშვნელო ფიზიკური დაპირისპირება. სხვა არანაირ ინფორმაციას არ ვფლობ.”
ყველაზე ინფორმირებული მომხდარ ფაქტთან დაკავშირებით #1 საჯარო სკოლის დირექტორი – მაია თავართქილაძე აღმოჩნდა.
მაია თავართქილაძე: ,, როგორც ჩემთვის არის ცნობილი, ჩხუბი თეატრის მახლობლად მდებარე პარკში 5 იანვარს მოხდა. მიზეზს ვერ გეტყვით ნამდვილად. რადგანაც სასკოლო არდადეგებია, ბევრი რამ ვერც ჩვენ გავიგეთ. ჩვენი სკოლის მოსწავლეები მეათე კლასელი დებია.” მისივე თქმით, დაპირისპირებული მხარეები უკვე შერიგდნენ, მოსწავლეები პოლიციაშიც იყვნენ დაკითხვაზე, მაგრამ საქმე ძიებაში აღარ არის. მათ სიტყვიერი გაფრთხილება მიიღეს.
“გურიის მოამბე”

მთავრობის ანტიინფლაციური პროგრამა შესაძლოა, მხოლოდ მოსახლეობისთვის ელექტროენერგიის 20-ლარიანი ვაუჩერის დარიგებით შემოიფარგლოს

მთავრობის ანტიინფლაციური პროგრამა შესაძლოა, მხოლოდ მოსახლეობისთვის ელექტროენერგიის 20-ლარიანი ვაუჩერის დარიგებით შემოიფარგლოს.
[18:43 17-01-2011]
საქართველოს პრემიერ-მინისტრ ნიკა გილაურის პრეს-სამსახურის უფროსი ნიკო მჭედლიშვილი მთავრობის ანტიინფალციური პროგრამის შინაარსის შესახებ ინფორმაციას არ ფლობს.
“ამის შესახებ არაფერი ვიცი. ვერაფერს გეტყვით”, – განუცხადა “პირWელს” მჭედლიშვილმა.
შეგახსენებთ, რომ ანტიინფალციური პროგრამის შექმნა მთავრობას პრეზიდენტმა მიხეილ სააკაშვილმა დაავალა.
გასული წლის 24 დეკემბრის მთავრობის სხდომაზე კი აღნიშნული პროგრამის ფარგლებში პრემიერ-მინისტრი ნიკა გილაური მოქალაქეებისთვის ელექტროენერგიის ვაუჩერების გადაცემის ინიციატივით გამოვიდა.
გილაურის თქმით, ინფლაციური პროცესებისგან მოსახლეობის დასაცავად მთავრობამ რამდენიმე ვარიანტი განიხილა და არჩევანი ელექტროენერგიაზე შეაჩერა.
“საუბარია იმაზე, რომ ყველა ოჯახი ელექტროენერგიის 20-20 ლარიან ვაუჩერს მიიღებს, რომელსაც ისინი მოხმარებული დენის საფასურის გადასახდელად გამოიყენებენ. ეს რა თქმა უნდა, პრობლემას ვერ მოხსნის, მაგრამ გარკვეულწილად მოსახლეობას დავეხმარებით”, – განაცხადა გილაურმა და დასძინა, რომ აღნიშნული პროგრამა მთავრობას დაახლოებით 20-დან 25 მილიონ ლარამდე დაუჯდება.
“20 ლარი – ეს არის ელექტროენერგიის დაახლოებით ერთი თვის საშუალო მოხმარება და თუ ეს ინიციატივა დამტკიცდა, მზად ვიქნებით, რომ თებერვალში ის უკვე განვახორციელოთ”, – აღნიშნა გილაურმა.
“პირWელი”

უზენაესი სასამართლო ვლადიმერ ვახანიას საქმის განხილვაზე უარს ამბობს…

უზენაესმა სასამართლომ უარი თქვა პოლიტპატიმრად გამოცხადებული ვლადიმერ ვახანიას საქმის განხილვაზე, ამის შესახებ „ღია ბოქლომს“ დაკავებულის ოჯახის წევრებმა აცნობეს… მიუხედავად დიდი მცდელობისა ჩვენმა რედაქციამ ვერ შეძლო სასამართლოს მიერ მიღებული ამ გადაწყვეტილების მიზეზეზის გარკვევა.

გაზიარება
[ილია ჩაჩიბაია. 19:16 14-01-2011]

შეგახსენებთ, რომ აკადემიკოსი ვახანია ქართველმა სამართალდამცავებმა 2008 წლის ოქტომბერში, ზუგდიდში, თითქოს, იარაღის უკანონოდ შენნახვის და ჟურნალისტისთვის პროფესიული მოვალეობის ხელის შეშლის აბსურდული ბრალდებით დააკავეს. განსასჯელის ადვოკატების მიერ მოპოვებული მტკიცებულებების მიხედვით ირკვევა, რომ გაზეთ „სამეგრელოს ქრონიკას“ ჟურნალისტმა ლელა ხუბულავამ აუდიოფირი, რომელიც დაკავებულის სახლში ჩხრეკის ჩატარების მიზეზი გახდა, საკუთარი ნებით გადასცა საქართველოს სიყვარულისთვის დევნილ ვლადიმერ ვახანიას. აკადენიკოსის დამცველების, ოჯახის წევრების და მოწმეების მტკიცებით კი ოჯახში ცეცხლსასროლი იარაღი სამართალდამცავებმა თავად შეიტანეს…
2009 წლის 11 სექტემბერს ზუგდიდის რაიონულმა სასამართლომ ვახანიას 4 წლიანი პატიმრობა მიუსაჯა. უსამართლო–სასამართლო პროცესები 3 კვირის განმავლობაში მიმდინარეობდა. მოსამართლემ და ბრალდების მხარემ დაკავებულის ადვოკატების არცერთი შუამდგომლობა არ დააკმაყოფილა. ჯალათი პროკურორი დიმიტრი ხვიტია და მკვლელი მოსამართლე დავით კეკენაძე ვახანიას ოჯახის წევრთა მოთხოვნის მიუხედავად განსასჯელის სამედიცინო დაწესებულებაში გადაყვანას არცერთ ჯერზე არ დასთანხმდნენ.
საქმის გასაჩივრებიდან 10 თვეში ქუთაისის სააპელაციო სასამართლომ პოლიტპატიმარ ვალდიმერ ვახანიას საქმის წარმოება დაიწყო და 2010 წლის 30 ივნისს განაჩენი გამოიტანა. ხელისუფლების ვერაგული განზრახვა, ქუთაისელმა მოსამართლეებმა სისრულეში წარმატებით მოიყვანეს და მხოლოდ 6 თვით შეამცირეს ზუგდიდის რაიონული სასამართთლოს სასჯელი…
აქციების ფონზე, ხმაურით მიმდინარეობდა ქუთაისში სასამართლო სხდომები. მაგალითად 21, 25 და 30 ივნისს გამართული პროცესები. დაცვის მხარემ სახელმწიფო ბრალმდებელი დიმიტრი ხვიტია და მოსამართლეები მარინა სირაძე, მარინა იმერლიშვილი და მურთაზ კაპანაძე, პროცესის გაჭიანურებით, გულითავადმყოფი განსასჯელის, მკვლელობის მცდელობაში არაერთხელ დაადანასაულეს.
თითქმის ყველა განხილვას ესწრებოდნენ ჟურნალისტები, ოპოზიციური პარტიების წარმომადგენლები და რუსი უფლებადამცველები, აგრეთვე დარბაზს გარეთ განსასჯელის ოჯახის წევრები მათ შორის ნანული ვახანია, რომელმაც 14 ივნისს ძმის გათავისუფლების მოთხოვნით თბილისში, ევროსაბჭოს მისიის შენობასთან, შიმშილობის აქცია დაიწყო. ქალბატონი ნანული ერთთვიანი შიმშილობის შემდეგ გონებადაკარგული არამიანცის საავადმყოფოში გადაიყვანეს, იგი კვლავ გეგმავდა აქციის გარძელებას, მაგრამ ექიმებმა, ახლობლებმა და სასულიერო პირებმა ამის უფლება არ მისცეს – ისევდაისევ მისი ჯანმრთელობის მძიმე მდგომარეობის გამო.
ნანული ვახანია განსაკუთრებულ პროტესტს სწორედ მაშინ გამოთქვამდა, როდესაც სასამართლოს დარბაზში დაუძლურებული აკადემიკოსი ვლადიმერ ვახანია კბილებამდე შეარაღებული და ნიღბიანი ბადრაგის თანხლებით შემოჰყავდათ და მისი ძმისთვის სამედიცინო დახმარების აღმოჩენის მოთხოვნაზე მოსამართლე და პროკურორი ირონიით უარყოფითად პასუხობდნენ. ამის გამო მას დარბაზი მრავალჯერ დაატოვებინეს.
პროფესიით იურისტი ვლადიმერ ვახანია, რომელიც ერთ-ერთ სხდომაზე სასამართლომ დაკითხა ყურადღებას ამახვილებდა მასზე განხორციელებულ კანონდარღვევებზე, მან პოლიცია და პროკურატურა ჩხრეკის დროს მის გაძარცვაში დაადანაშაულა. ვახანიას თქმით ნაღდი ფული და რამოდენიმე ძვირადღირებული ნივთი სამართალდამცავებმა და პროკურორმა დიმიტრი ხვიტიამ მიითვისეს…
ვახანიას გასამართლებიდან ცოტა ხანში ქართულ პოლიტიკას ახალი პარტია „მთლიანი საქართველო“ შეემატა. დამფუძნებლების განცხადებით პარტია ცენტრისტული ორიენტაციისაა და მისი მთავარი მიზანი პოლიტპატიმრების დაცვაა.
პარტიის ლიდერი, აკადემიკოსი ვლადიმერ ვახანია მოძრაობის დაფუძნებას დაკავებამდე დიდი ხნით ადრე გეგმავდა, თუმცა ამის საშუალება ცნობილი მიზეზის გამო არ მიეცა…
ვლადიმერ ვახანიას ზუგდიდში უამრავი მხარდამჭერი ჰყავს, ბიზნესმენი თანხებს არ ზოგავდა, თანაქალაქელებს რომ დახმარებოდა. ზუგდიდში აქტიურად საუბრობენ ბატონი ვლადიმერის დაკავების რეალურ მიზეზებზე. როგორც ჟურნალ „ღია ბოქლომის“ მკითხველს მოეხსენება, ცოტა ხნის წინ მეგრულ–ქართული ლექსიკონის შვიდტომეული გამოიცა, რომლის ერთ–ერთი ავტორი სწორედ ვლადიმერ ვახანია გახლავთ. ამ წიგნმა კიდევ ერთხელ დაამტკიცა, რომ მეგრული ენა უნიკალური და მსოფლიო ენებს შორის გამორჩეულია. მარტო იმის ხმამაღლა გაცხადება რად ღირს, რომ ამ ქართველურ ენაში, ფაქტობრივად, 120 მილიონი სიტყვაა!!! აკადემიკოსის დაკავების ერთ–ერთი რეალური მიზეზიც ეს გახლავთ – სააკაშვილის პირსისხლიანმა მთავრობამ საქართველოს გამთლიანებაზე და მეგრულის, როგორც ჭეშმარიტად ქართველური ენის, განსაკუთრებულობაზე ღიად საუბარი არ აპატია აკადემიკოს ვლადიმერ ვახანიას…

„ნუ იყიდით და წაიკითხავთ ვანოს „ვერსიას! “ – „ობიექტივი“ მოგიწოდებთ

პირველკურსელმაც კი იცის, რომ ე.წ. შავი ფიარი მანკიერიაცაა და დასჯადიც. თუმცა, საქართველოში (მიხეილ სააკაშვილის დაუღალავი შრომის ფასად) შავი ფიარი ბატონობს. შავი ფიარი ბატონობს არა მარტო სახელისუფლებო, არამედ მოსყიდულ, ფსევდო-ოპოზიციურ მედიაშიც. სწორედ ასეთია გაზეთი „ვერსია“ და ამას რამდენიმე მაგალითით დავადასტურებ.
წერილი მაია ფურცელაძეს. „ვერსიის“ მთავარ რედაქტორს!
[19:44 16-01-2011]
სულ ორიოდე კვირის წინ, უფრო ზუსტად 2010 წლის 27 დეკემბერს „ვერსიის“ ჟურნალისტმა ფრიდონ დოჩიამ წინააღმდეგობის მოძრაობის ლიდერის დავით თარხან-მოურავისგან ინტერვიუ აიღო. რამდენიმე დღეში კი, გაზეთ “ვერსიაში” დაიბეჭდა სტატია, ასეთი სათაურით: “პაატა შევარდნაძე ახალ პარტიას ქმნის“. პირველ გვერდზე გამოტანილ სათაურს, არც კითხვის ნიშანი და არც ძახილის ნიშანი დასმული არ ჰქონია, ანუ გამოყენებული იყო მტკიცებითი ფორმა. მესამე გვერდზე კი, სადაც დოჩიას ინტერვიუ ვრცლადაა გამოქვეყნებული, იგივე სათაური კითხვითი ფორმით არის წარმოდგენილი: „პაატა შევარდნაძე ახალ პარტიას ქმნის?“ ჟურნალისტებმა და ფიარის სპეციალიტებმა კარგად ვიცით: მედიაში როდის, რატომ და რა მიზნით გამოიყენება სათაურისა და ინტერვიუს შინაარსის აღრევის ხერხი. მოგეხსენებათ, ადამიანების დიდი ნაწილი მხოლოდ პირველ გვერდზე გამოტანილ სათაურს კითხულობს და ზოგჯერ მხოლოდ სათაურით ექმნება წარმოდგენა კონკრეტული თემის ირგვლივ. არასწორი წარმოდგენა იქმნება მაშინ, თუ სტატიაში გამოთქმული მოსაზრება პირველ გვერდზე გამოტანილ სათაურს არსობრივად ეწინააღმდეგება. მეორე- პირველ გვერდზე გამოტანილი სათაური, მყვირალა სათაური, როგორც წესი, ყოველთვის თანხმდება გაზეთის მთავარ რედაქტორთან. ამ პატარა დეტალზე ხაზგასმა იმისთვის დამჭირდა, რომ ჩემს კოლეგას, „ვერსიის“ მთავარ რედაქტორს მაია ფურცელაძეს პირველი შეკითხვა დავუსვა: მაია, ამ კონკრეტულ შემთხვევაში ჟურნალისტური ეთიკაც და სტანდარტიც რომ დაარღვიეთ, ვერ ხვდებით?

დამაფიქრებელია ისიც, რომ სათაურის კონტექსტი ხელოვნურადაა დაკავშირებული როგორც წინააღმდეგობის მოძრაობასთან, ისე პაატა შევარდნაძესთან. კი, ბატონო გაქვთ ვერსია, რომ გვაფინანსებს ბატონი პაატა (ისე, თუ ძალიან გაინტერესებთ, შევარდნაძის ვაჟი არ გვაფინანსებს და თუ დაგვაფინანსებს მომავალში, ამის თაობაზე აუცილებლად ღიად გაცნობებთ) , მაგრამ თუ თქვენი რესპონდენტი ამ ვერსიას კატეგორიულად უარყოფს, მაინც რატომ სტოვებთ უცვლელად სათაურს?!… პირდაპირ გეტყვით: ესაა ინფორმაციის დამახინჯებაა, რაც არაკეთილსინდიერი, დაკვეთილი ჟურნალისტიკისთვისაა დამახასიათებელი. ამავე სტატიაში ნათქვამია, რომ ერთ-ერთი ვერსიით, ჩვენი მოძრაობა ვანო მერაბიშვილთანაა კავშირში. ეს კი, რესპოდენტის დისკრედიტაციისათვის კეთდება. თუ ქალბატონ მაიას ეს არ ესმის, მეც ვეუბნეუბი: ერთ-ერთი ვერსიის თანახმად, ვერსიით შენ და დოჩიას ეს სტატია სწორედ ვანო მერაბიშვილმა დაგიკვეთათ.
დღეს „ობიექტივის“ ჟურნალისტებმა ქალბატონ მაიას კომენტარისთვის დაურეკეს. მან კი, უპასუხა,- ორი თვის მერე რომ რეკავთ, აქამდე სად იყავით. ზუსტად ორი კვირა გელოდეთო. მგონი, ქალბატონ მაიას კალენდარი ეშლება. ჩვენი მოძრაობის შექმნიდან ერთი თვე არ გასულა, ხოლო სტატიის დაბეჭდვიდან ორი კვირა ძველ ახალ წელს დაემთხვა. თუმცა, არ მესმის მე რატომ უნდა დამერეკა „ვერსიის“ მთავარი რედაქტორისთვის? ანუ ქალბატონ მაიას ჰგონია, რომ როცა ფულს აიღებს და ამის საფასურად შეგვაფურთხებს, ჩვენ კი არ უნდა ვუპასუხოთ, არამედ დავურეკოთ და ,ალბათ, ბოდიშიც მოვუხადოთ.
ქალბატონო მაია, ახლა რომ ეუბნები „ობიექტივის“ ჟურნალისტებს,- ოცი წელია ვმეგობრობ ირმასთანო… ალბათ, ამ მეგობრობის გამოა, შენმა გაზეთმა წინააღმდეგობის მოძრაობის სადისკრედიტაციო ინტერვიუების სერიალი რომ შესთავაზა მკითხველს. 2011 წლის 12 იანვარს „ვერსიამ“ გამოაქვეყნა ინტერვიუ თემურ შაშიაშვილთან. დააკვირდით ჟურნალისტის კითხვას. ციტატა:“ – მაგრამ ამ მოძრაობის უკან პოლიტიკოსები მაინც მოიაზრებიან და ამას თავად ადასტურებთ. როგორც ამბობენ, წინააღმდეგობის მოძრაობას პაატა შევარდნაძე აფინანსებს.“ ვინ ამბობს? რას ამბობს? და თუ ამბობს, „ვერსია“ დაუზუსტებელ „ვერსიებს“ რატომ უწევს ტირაჟირებას? არ გეჩვენებათ, რომ ჟურნალისტის შეკითხვაში ხელოვნურადაა დაკავშირებული ერთმანეთთან წინააღმდეგობის მოძრაობა და პაატა შევარდნაძე? რატომ ხელოვნურად? იმიტომ, რომ გაზეთმა „ვერსიამ“ ჩვენგან ჯერ კიდევ ერთი კვირის წინ მიიღო პასუხი, რომ ბატონი შევარდნაძე არ გვაფინანსებს. თუმცა, მცდარი „ვერსია“ კვლავ ცოცხლობს. უფრო სწორად, გაზეთი „ვერსია“ აცოცხლებს. საკითხავია,- ნეტავ, რატომ? ამავე ინტერვიუში ჟურნალისტი კითხვასაც აღარ სვამს და გადაჭრით ასკვნის. ციტატა: “გამოდის, წინააღმდეგობის მოძრაობა ხელისუფლების შექმნილია, მით უმეტეს, ის კრებიდან წამოსული ხალხითაა დაკომპლექტებული“. დაუფიქრდით ამ ნიუანსს, რაც ნიუანსი ნამდვილად არ არის – ხელოვნურად გვაკერებთ ხან პაატა შევარდნაძეს, ხან- ვანო მერაბიშვილს… მაგრამ მე თავისმართლებას კი არა, ბრძოლას ვაპირებ თქვენთან და (თქვენი სახით) უსიდინდისო, უზნეო და გაყიდულ ჟურნალისტიკასთან.
მესამე მაგალითი- 2011 წლის 14 იანვარს გაზეთი „ვერსია“ აქვეყნებს ინტერვიუს ნონა გაფრინდაშვილთან. ქალბატონი ნონა აცხადებს, რომ წინააღმდეგობის მოძრაობაში ყველას ამბიცია აქვს. ლელიკო ჯაფარიძეს, ირმა ინაშვილს, სოსო მანჯავიძეს – ჩვენ „განაწყენებულთა ჯგუფი“ ვართ. მოკლედ, თემა ისე გრძელდება, რომ მხოლოდ წინააღმდეგობის მოძრაობის მიმართ ისმის გაურკვეველი ბრალდებები. ამას საზოგადოებრივი აზრის ფორმირება ჰქვია, კეთილსინდისიერი ჟურნალისტიკა ასეთ შემთხვევაში მეორე მხარის კომენტარსაც იღებს.
2011 წლის 15 იანვარს გაზეთ „ვერსიის“ მთავრმა რედაქტორმა ქალბატონ მაია ფურცელაძემ “ობიექტივის“ კორესპონდენტთან შემდეგი კომენტარი გააკეთა. კომენტარი ვრცელია და მას უცვლელად გთავაზობთ:“ ირმა ინაშვილს თვითონ უნდა დაერეკა ჩემთვის და არა დოჩიასთვის, შაშიაშვილისთვის და ნახევარი საქართველოსთვის. ახლა რომ მთხოვთ კომენტარს, ორი თვის შემდეგ ეს ეთიკურია, კოლეგიალურია?! მე თქვენ გელოდეთ ზუსტად ორი კვირის განმავლობაში. ორი კვირის შემდეგ თქვენ გააკეთეთ ის, რაც არ უნდა გაგეკეთებინათ და მხოლოდ ამის შემდეგ გავხდი იძულებული, რომ პრესით მომემართა თქვენთვის, თორემ მე არ ვარ ჩვეული ასეთ კონფლიქტებს. მითუმეტეს, ირმასთან და იმ ადამიანებთან, ვისთანაც წლების ურთიერთობა მაკავშირებს. თქვენ არ უნდა მირეკავდეთ მე. ამას გაიგებთ ოცი წლის შემდეგ, ოცი წლის წინანდელი მეგობრები, რომ მოგექცევიან ასევე. ამას ადამიანურად გეუბნებით, გასაგებია? ეს გადაეცით ირმას. კომენტარი გაგეკეთებინათ მაშინ, როდესაც ეჭვი გაგიჩნდათ. ეს მხოლოდ თქვენი ეჭვებია. როცა ეს ეჭვი გაგიჩნდათ, სუბორდინაცია უნდა დაგეცვათ იმიტომ, რომ გაზეთს ჰყავს რედაქტორი, რომელიც ყველაფერზე აგებს პასუხს, ანუ მე. აგეღოთ ტელეფონი, დაგერეკათ ჩამთვის და მე გიპასუხებდით. არ იყო საჭირო მივარდნები და საქმის გარჩევები შაშიაშვილებთან. ჯერ ჩემთან დაგერეკათ. მე სწორედ ასე მოვიქეცი, როდესაც გაჩნდა ინფორმაცია ინაშვილზე და ”ობიექტივზე”, გამოვაგზავნე ჟურნალისტი და გადავამოწმე. ასევე უნდა მოქცეულიყავით თქვენც. ახლა რომ მირეკავთ, დღეს რა აზრი აქვს ჩემს ლაპარაკს? ამიხსენით, გეკითხებით, დღეს რა აზრი აქვს ჩემს ლაპარაკს? ჟურნალისტებს შორის არსებობს რაღაც ეთიკური ნორმები, რომელიც ჩვენ უნდა დავიცვათ, პირველ რიგში. ამ ყველაფერს მიხვდებით მაშინ, როდესაც ჩემხელა სტაჟი გექნებათ. ქალბატონ ირმას გადაეცით, რომ მე ამ ფორმით არ უნდა მელაპარაკებოდეს, ამას ჩვენი მრავალწლიანი ურთიერთობა მოითხოვს. ჯერ ჩემთან უნდა გაერკვია და მერე უნდა გაეკეთებინა ის, რაც გააკეთა. ახლა კარგად ბრძანდებოდეთ.“
არ დაგიმალავთ, მაია ფურცელაძის ამ პასუხმა ჩემზე უმძიმესი შთაბეჭდილება დატოვა. ვიმეორებ- ქალბატონო მაია, თუ ჩემთან ოცი წლის მეგობრობაზე საუბრობთ, მაშინ მე კი არა, თქვენ უნდა დაგერეკათ ჩემთვის. თქვენმა გაზეთმა უხეშად დაარღვია როგორც ჟურნალისტური ეთიკა, ისე სტანდარტი და ახლა მე მელაპარაკებით კოლეგიალობაზე, რაც თავისთავად შეურაცხმყოფელია. დალოცვილო, ვიდრე კორესპონდენტს გამოაგზავნიდი და სტატიას დაბეჭდავდი (თან, ცილისმწამებლურ ბრალდებებს გაავრცელებდი), მანამდე თავად დაგერეკა და გეკითხა,- ვინ მაფინანსებდა… ვანო, თუ პაატა, თუ ორივე ერთად? მაგრამ არ დამირეკე და თვითონაც იცი, რატომ. დამკვეთის ინტერესი დაიცავი და არა კოლეგის ღირსება. ამიტომ ,ნება მიბოძე, დღიდან შენი გაზეთი არაკეთილსინდისიერ გამოცემაც მოვიხსენიო, როგორც „ობიექტივის“ ეთერში, ისე სხვა მედია-საშუალებებით. „სუბროდინაცია უნდა დაგეცვათ. იმიტომ, რომ გაზეთს ჰყავს რედაქტორი და ისაა პასუხისმგებელი ყველაფერზეო“,- მითვლი. მთავარი რედეაქტორი რომ ხარ და პასუხისმგებლობას არ გრძობ (არც კოლეგის და არც მკითხველის წინაშე), ამიტომ გეუბნები: შენი გაზეთი ბინძურ დაკვეთას ასრულებს. ეს დაკვეთა მხოლოდ სააკაშვილ-მერაბიშვილის ინტერესს ემსახურება და ამიტომაც გაზეთ „ვერსიას“ დღეიდან ყოველგვარი კითხვის ნიშნების გარეშე (თქვენს სტილს გამოვიყენებთ) ვანოს გაზეთად მოვიხსენიებთ. ლოზუნგისაც შესაფერისს მოგისადაგებთ:“ გაზეთი „ვერსია“ ვანოს ბინძურ „ვერსიებს“ ავრცელებს. ნუ წაიკითხავთ და ნუ ენდობით „ვერსიას“, რომელიც ვანოსია!“ ღიად გეუბნები, რომ ამ კამპანიას დღეიდან ვიწყებ და თვეების მანძილზე გავაგრძელებ. „ობიექტივის“ საეთერო რესურსი აქტიურად მოხმარდება იმ ფსევდოჟურნალისტების მხილებას, რომლებიც ჟურნალისტის პროფესიას და ღირსებას ჩრდილს აყენებენ. ამიტომაა, რომ საზოგადოება აღარ გენდობათ. ჩვენ კი, პატიოსანი ჟურნალისტიკის დისკრედიტაციის საშუალებას არ მოგცემთ! მთავარი რედაქტორი რომ ხარ და პასუხისმგებელი რომ ხარ, მეც ამ მთავარ საკითხში მაქვს შენთან პრეტენზია: სად იყავი, როგორც მთავარი რედაქტორი, როცა გაზეთის პირველ გვერდზე (კითხვის ნიშნის გარეშე) აბსურდული სათაური გამოგქონდათ? სად იყავი, როგორც მთავარი რედაქტორი, როცა შენი ( საგანგებოდ) შერჩეული რესპონდენტები ირმა ინაშვილს ლანძღავდნენ? სად იყავი, როგორც მთავარი რედაქტორი, როცა წინააღმდეგობის მოძრაობას ხელოვნურად აკერებდნენ ხან მერაბიშვილს, ხან შევარდნაძეს… საერთოდ, სადა ხართ? როგორია თქვენი მსოფლმხედველობა? როგორ გესმით წესიერება და ზნეობა? როგორ გესმით ჟურნალისტიკის არსი? რას ნიშნავს „სუბორდინაცია“? ანუ ჟურნალისტი თქვენს გაზეთში დამოუკიდებელი არ არის და შენ, მთავარი რედაქტორი ხარ, სტატიების ციკლის ავტორი, ასე უნდა გავიგო, თუ არა?… მოკლედ, სხვადასხვაგვარად გვესმის ჩვენ ჟურნალისტის პროფესიის არსი და მითუმეტეს,- მეგობრობა და კოლეგიალობა. ჩემი სათქმელი გითხარი. გვისმინე ყოველდღე, რადიოტალღაზე FM 105.0, სადაც „ობიექტივის“ ჟურნალისტები მსმენელს ყოველდღე გაუმეორებენ, რომ არ იყიდონ ვანოს გაზეთი „ვერსია“! არ დაუჯერონ ვანოს „ვერსიებს“. ჩვენი ვალია დავიცვათ მკითხველი ტყულისა და ბინძური ჟურნალისტიკისაგან და გპირდები, რომ ამას ყველა ჟურნალისტური სტანდარტის დაცვით გავაკეთებთ.
მედია-კავშირ „ობიექტივის“ ხელმძღვანელი და წინააღმდეგობის მოძრაოაბის დამფუძნებელი ირმა ინაშვილი. 2011 წლის 16 იანვარი. თბილისი.

„დღეს ხელისუფლებას ეშინია სამეგრელოში და არა პირიქით“

„ქართული პარტიის“ თავმჯდომარემ სოზარ სუბარმა, თანათავმჯდომარე ლევან გაჩეჩილაძემ და “ქართული პარტიის” პოლიტსაბჭოს წევრმა კახა მიაქაიამ ზუგდიდში სამეგრელოს რაიონებიდან ჩოსულ მხარდამჭერებსა და აქტივისტებს პარტიის სამომავლო გეგმები გააცნეს.
[16:22 18-01-2011]
როგორც შეხვედრაზე სოზარ სუბარმა განცხადა, უახლოს თვეებში „ქართულ პარტიას“ საკუთარი წარმომადგენლობა ეყოლება საქართველოს ყველა სოფელში, რაიონში, ქალაქსა და რეგიონში.
“გაზაფხულისთვის „ქართულ პარტიას“ 50 ათასი წევრი ეყოლება და ყველა დაინახავს, რომ სწორედ ეს პოლიტიკური გუნდი იქნება სააკაშვილის ხელისუფლების ყველაზე რეალური ალტერნატიული ძალა.
ლევან გაჩეჩილაძემ კი სამეგრელოს რეგიონში შექმნილ სოციალურ-პოლიტიკურ ვითარებაზე გაამახვილა ყურადღება. მისი თქმით ხელისუფლება ვეღარ შეძლებს ხალხის დაშინებას და „საქართველოს გადარჩენა სამეგრელოდან დაიწყება“
„დღეს ხელისუფლებას ეშინია სამეგრელოში და არა პირიქით“ – აღნიშნა შეხვედრაზე “ქართული პარტიის” ლიდერმა.
დღესვე ზუგდიდში „ქართული პარტიის“ რეგიონული ორგანიზაციის ოფისი გაიხსნა.
ოფისში მოხდება „ქართულ პარტიაში“ გაწევრიანების მსურველთა აღრიცხვა და რეგისტრაცია. ასევე შეიქმნება საინიციატივო ჯგუფი, რომელიც პარტიის რეგიონული ორგანიზაციის დამფუძნებელ კონფერენციას მოამზადებს.